الهكر : هيا كلمة يختص بيها المبرمج الي عندة مهارات خاصة بالبرمجة وامن المعلومات واطلقت هاي الكلمة على مبرمجين اذكياء جانوا يحاولوون اختراق مختلف الانظمة
ومو بالضرورة يكون الهدف الاساسي هو التخريب او المسح او السرقة
خلال الفترة الماضية حصرت شركة مايكروسوفت على انوا تضمن هذولة الهكر لشركتها وتنطيهم رواتب كلش عالية
وشغلهم هو بس يخترقون شكو نظام جديد تطرحة الشركة وايجاد الثغرات بيه
ويحاولون ان يضعون حلول لهاي الثغرات
واغلب الهكرية همة متخفين باسامي مو اساميهم وحتى ما يحاولون يبينون انوا همة هكر
لسبب كلش بسيط حتى الناس لا تكون حذرة منهم وخاصتا هسة بالوقت الحاظر صار الكومبيوتر والحاسبة تحتوي على كل الخصوصيات والعمل والاشياء المهمة
واهنا راح نحصل على معلومةكلش مهمة هي انوا مو كل الهكر مو خوش ولا كلهم خوش
العالم كلة اختلف على تعريف الهكر انوا همة خوش ناس او همة مو خوش ناس
ويرجع هذا للتعبئة الاعلامية الخاطئة بتعريف هذه الكلمة
نجي هسة لتصنيف الهكر
اهنا اكو ثلاث تصنيفات للهاكر
اولا: هكر القبعة البيضاء
ثانيا : هكر القبعة السوداء
ثالثا : هكر القبعة الرمادية
اجتي تسمية القبعة البيضاء والسوداء والرمادية من افلام رعاة البقر الامريكية جانوا الي يلبس قبعة بيضة هذا هو خوش ادمي وماعندة اذية والي يلبس قبعة سوداء هذا ابو الطلايب والمشاكل والقبعة الرمادية هذولة الي يكونون بين وبين مرات خوش ومرات مو خوش
نفس هاي الاوصاف اتصنف بيها الهكر
اكو منهم المصلح والمخرب واكو الي مرة يصلح ومرة يخرب
ومعلومة بعد اهم لو ما الهكر ما جان عدنا هذا نظام الحماية الي احنا بيه ولا جان عدنا اي خصوصية بالانترنيت
لان همة الي وجدوا الثغرات الموجودة بالتطبيقات وهمة الي صلحوها
هجمات الهكر تتقسم الى اربع انواع
الاول منها / قطع خدمة الانترنيت ( طبعا على مستوى قمر او دولة تصير هاي الحالة مو يقطع خدمة انترنيت يوزر واحد )
الثاني / اصابة النظام بالشلل بهاي الحالة يكومون يحملون الخادم او الذاكرة الخزنية للسيرفر بملفات ذات حجم عالي وبهاي الحالة راح يصير شلل بالنظام وخربطة
الثالث / الثغرات المنية بهاي الحالة الهكر لازم يعرف شنو النظام الموجود وشنو اساسياتة ولازم تكون عندة معلومات عن خلفية النظام على مود يكدر يعرف الثغرات الموجودة بيه وعن طريق هاي الثغرات راح يكدر يخترقة ويحصل على المعلومات الي ابداخلة
الرابع / احصنة الطروادة بهاي الحالة راح تصير عملية ارسال برنامج متنكر بغير صيغة للنظام وراح يرجع يرسل هذا البرنامج المعلومات الي جان رايدها هاي البرامج الي احنا نسميها الباتش بس بالحقيقة هيا مو باتش
نجي هسة للنقطة الاهم بهذا الموضوع
اشلون الهكر يخترقون المواقع
العملية هاي تتم عن طريق خطوتين
الخطوة الاولى هي :
جمع المعلومات حول الموقع الي يريد يخترقة واهم هاي المعلومات الي يحتاجها هي رابط الموقع وشنو نظام التشغيل الي يشغل الموقع والي منصب على سيرفر الموقع والسكربتات اهنا راح يكوم يفحص السكربتات ويشوف بيها خلل ثغرات او لا وهاي الثغرات تجي من اخطاء برمجية يوكع بيها المبرمج بدون ما يعرف وهيا هاي الثغرات الي من خلالها راح يكدر يهكر الموقع
الخطوة ثانيا :
الهجوم بهاي المرحلة راح يبدي يستغل هاي الثغرات الموجودة ودائما هذا الاستغلال يكون على شكل رابط وراها يدخل الهكر للصفحة لوحة التحكم مال مدير الموقع ويكوم يتصرف بالموقع كانما هو صاحب الموقع او يكوم يرفع ملفات خبيثة على الموقع
صفحتي على الفيس بوك
http://www.facebook.com/PROFESSIONALBEST
ليست هناك تعليقات:
إرسال تعليق